Belvedere Tools aurkezten dugu: doako 8 marketin-tresna

Belven astero errepikatzen diren zeregin txikien zerrenda bat dugu: kartel baterako QR bat sortzea, web bateko argazkiak arintzea igo aurretik, kanpaina bateko UTMdun estekak prestatzea, izenburu batek Googlen tokirik baduen egiaztatzea… Bost minutuko kontuak dira, baina horiek egiteko webetik webera ibiltzen ginen, iragarki, derrigorrezko erregistro eta ur-marken artean.

Beraz, ondoen dakiguna egin dugu: geure irtenbidea eraiki. Gaur Belvedere Tools aurkezten dugu, doako 8 marketin-tresnaren bilduma bat, gure webetik erabil ditzakezunak, erregistratu gabe eta ezer ordaindu gabe.

Zergatik egin ditugu geure tresnak

Egunero erabiltzen ditugu online tresnak, eta pixka bat nekatuta geunden betiko tranpekin: ordaintzen ez baduzu egun gutxiren buruan funtzionatzeari uzten dion QR «doakoa», zure argazkiak non dagoen ez dakizun zerbitzari batera igotzen dituen konprimatzailea, edo emaitza erakutsi aurretik emaila eskatzen dizun formularioa.

Horregatik, Belvedere Tools sortzean hiru arau jarri genizkion geure buruari:

• Doan eta erregistrorik gabe. Sartu, erabili eta joan. Iragarkirik eta ur-markarik gabe.
• Zure fitxategiak zurekin geratzen dira. Tresna ia guztiek zure nabigatzailearen barruan funtzionatzen dute: zure irudiak, koloreak edo testuak ez dira inongo zerbitzarira igotzen. Salbuespen bakarra SEO eta GEO aztertzailea da: berrikusi nahi duzun orria irakurri behar du, eta emaitza minutu batzuetan bakarrik gordetzen du kontsulta ez errepikatzeko.
• Benetan erabilgarriak. Geuk proiektu errealetan erabiltzen ditugun tresnak dira, edozein bezerori emango genizkiokeen ohar eta aholkuekin.

8 tresnak

Denak dituzu belvedere.eus/eu/tresnak helbidean. Hona hemen errepaso azkarra:

1. QR kode-sortzailea

Sortu QRak URL baterako, zure WiFi sarerako, harremanetarako txartel baterako (vCard), email baterako, telefono baterako, SMS baterako edo WhatsApperako. Koloreak eta estiloa aukera ditzakezu, baita zure logoa erdian jarri ere. PNG formatuan deskargatzen dira weberako eta SVG formatuan inprentarako, eta estatikoak dira: ez dira inoiz iraungitzen. Sortu QR bat →

2. Irudi-konprimatzailea

Murriztu zure argazkien pisua eta bihurtu WebP, JPG edo PNG formatura, kalitatea eta gehieneko zabalera doituz. Hainbat aldi berean arrasta ditzakezu eta guztiak .zip batean deskargatu. Bide batez, EXIF metadatuak ezabatzen ditu, GPS kokapena adibidez. Irudiak izan ohi dira web batean gehien pisatzen dutenak; beraz, webak azkarrago karga dezan modurik azkarrenetako bat da. Konprimatu irudiak →

3. SEO eta GEO aztertzailea

Idatzi orri baten URLa eta bi puntuazio lortuko dituzu: bata SEO klasikoarena (izenburua, meta deskribapena, goiburuak, irudiak, estekak, indexazioa…) eta bestea GEOrena, adimen artifizialeko bilatzaileetarako zenbateraino dagoen prest neurtzen duena. Zein robotek irakur dezaketen ere esaten dizu: ChatGPT, Claude, Perplexity, Google edo Bingenek. Aztertu orri bat →

4. UTM sortzailea

Eraiki UTM parametroak dituzten estekak, zure kanpainak Google Analytics 4n neurtzeko. Kanalen araberako txantiloiak ditu (Google Ads, Meta, LinkedIn, newsletterra, QR inprimatua…), dena letra xeheetara eta azenturik gabe pasatzen du, iturria eta bitartekoa nahasten badituzu ohartarazten dizu eta historia bat gordetzen du zure nabigatzailean. Sortu UTM estekak →

5. Google-ko aurrebista

Idatzi zure izenburua eta meta deskribapena, eta ikusi nola geratuko diren Googleren emaitzetan, mahaigainean eta mugikorrean. Pixeletan neurtzen du, Googlek egiten duen bezala, eta testua moztu aurretik ohartarazten dizu. Ikusi aurrebista →

6. llms.txt sortzailea

llms.txt fitxategia, oraindik proposamen fasean dagoena, zure weba hizkuntza-ereduek erraz irakurtzeko moduko formatuan laburtzen duen fitxategia da. Formulario erraz bat betetzen duzu, eta zure domeinuaren errora igotzeko prest ematen dizu. Sortu zure llms.txt →

7. JSON-LD schema sortzailea

Sortu datu egituratuak enpresa, tokiko negozio, artikulu, ohiko galdera, produktu edo ekitaldietarako. Kodea kopiatu, zure webean itsatsi eta Googlen balidatzen duzu klik batekin. Sortu schema →

8. Kontraste-egiaztatzailea

Neurtu testuaren kolorearen eta atzealdekoaren arteko kontrastea, WCAG irisgarritasun-jarraibideen arabera. Gutxienekora iristen ez bada, tonu bereko kolore irisgarri hurbilena proposatzen dizu, zure markaren paletari uko egin behar ez diezazun. Egiaztatu kontrastea →

Eta GEO hori zer da?

Ohartu bazara, zortzi tresnetatik hiruk (aztertzaileak, llms.txt sortzaileak eta schema sortzaileak) leku berera begiratzen dute: AAdun bilatzaileetara. Gero eta jende gehiagok galdetzen die zuzenean ChatGPTri, Perplexityri, Clauderi edo Googleren AA bidezko laburpenei, esteka-zerrenda bat arakatu beharrean. GEOa (Generative Engine Optimization) zure weba sistema horiek uler, aipa eta gomenda dezaten prestatzean datza.

Ez da magia, eta ez du betiko SEOa ordezkatzen, baina badira alde handia egiten duten xehetasun teknikoak: robot egokiak ez blokeatzea, edukia HTMLan izatea eta ez JavaScripten bakarrik, edo datu egituratuen bidez nor zaren eta zer egiten duzun azaltzea. Hori egiaztatzea erraza izatea nahi genuen.

Etxean eginak

Tresnak gure webaren barruan bizi dira eta gure hizkuntza bisuala hitz egiten dute: kolore berak, tipografia bera eta, behean ezkerrean dagoen hautatzailearekin kolore-modua aldatzen baduzu, haiek ere egokitu egiten dira. Xehetasun txikia da, baina gustatzen zaigu Belvedereren parte direla sentitzea, eta ez gehigarri bat.

Lehen bertsio bat da eta hazi dadin nahi dugu. Tresnaren bat faltan botatzen baduzu edo daudenak hobetzeko ideiaren bat baduzu, idatzi iezaguzu: erabiltzen dituztenen iradokizunak dira gehien laguntzen digutenak.

Eta behar duzuna tresna batean sartzen ez bada, horretarako gaude gu. Hitz egin dezagun.